Jar-û Diyar

Hawar Tornêcengi/

Meseli/Kuratey/Qaluy II (Meseller, Fikralar)

Xıdır damis nêbeno, çınga hetê veri dano, vano:

“Xoce, tı waa xo na dina de bıdê mı; ez ki, huzurê na cemati de, heqa xuya 40 Huri-Meleku a dina de dan to.”

------------------------------------------------------------

Meseli/Kuratey/Qaluy II (Meseller, Fikralar)

-4-

HAKO HENEN, ANCAX LÊO NİANEN DE POJİNO.

Rozê, dewa de Pılemoriye de camat biyo, dewunê dormi ra ağleri biyê top, amê qorr de niştê ro. Her ju qeseyê vano, jumini sero kenê sur. Wertê na camati de ki di mordemê jurekerê zaf meşhur (nasbiyayi) benê. Jurekeri niadanê ke  hewa camati, verva pêrodayisi sona. Jurekero ju qeseyê keno werte ra ke, mılet va tenê ğayis bo, juminiro nêdo. Vano:

- Mı tarixê de, eve lıngu na pa, şiyu ke, şêri Erzıngan. Şine Kamax de vejine, ‘ke çı bivêni; theyre hakê kerdo, hak gırr biyo, gıno boğazê Kamaxi ro, ağwe fişta arê, hevê mendo ke suka Erzingani bicêro xo ver.  Qut’ro mı bıriya, cêrune ra, peyser amune çê.

Jurekero bin damis nêbeno, xo erzeno werte, vano:

- Lao, -to vake, ame mı viri- Ez zamanê şine Estemol de gurine. Mı reyê niada ke, des u dı hostay, nezeliyê cı, lêyê vırazenê, hama vengê çakuçê kêşi gosê kêşi nêsono.

Jurekero vıren damis nêbeno, vano:

- Oli adırê na jürê torê ha! O sene lêo ke honde gırso, des u dıteney ki tey gurinê, hama veng jumini nêsono?

Jurekero peyen cêreno’ra cı, vano:

- Ma çenedırraye! A sene theyra ke hakê xo honde gırso, çhemi bestneno arê?

Hako henen, ancax lêo nianen de pojino.(Berhem, sayı: 7, 1990)

-5-

Taê qul esto ke xo zaf berz cêno, coru xo dustê kesê bini ra nêcêno. Made mordemê nianeni rê vanê "Fırneberz". Taê mordemi ki estê ke xo jêde goynenê hama peyniye de yeno werte ke, gure u bêzarkerdena xo vaten u goynayisê xo nêcêna. Hama oncia ki mordemê nianeni hên zonenê u hên hereket kenê ke, saê ke fırna dine nê, yê kêsê bini  ama hard.

Ju mesela esta ke ters u xof sero vajina.

Coka vanê "ters; gao qers!"

Sıma Mangakelaze zonenê.

Manê ke, waxto ke manga yena gay u boğey kunê ra dıme, o waxt beno.  Mesela nia vajina:

Dıasê boğey kunê ra Mangakelaze dıme, boyna manga fetelnenê ke bıerjiyê ra ser. Gao de khurkın (kokım) ki kuno’ra ve dıme, dımera vozzeno.

Cıra perskenê:

»Yaw hadê na boğey kunê’ra Mangagae dıme, tıya khurkın çıra hurêndia xode nêvındena? Nê lao, na kokımiye de torê çı Mangakelaze!«

Gao kokım cêreno’ra cı, vano:

»Sıma vanê belka ez serva Mangakelaze kun ra dıme? Nê-nê, awa ke sıma vanê, a niya. Ez tersê peyniya xo ver kun’ra dıme!..«

-6-

HURİ-MELEKİ

Ju Xoce newe do Xarpêt. Mulxıtê çê xo ki tey ardo. Herroz camiye de vaaz dano, qalê  cennet u cenemey keno, qalê “Huri-Melek”u keno.

Xıdırê ma ki zerri verda waa Xocey, uza’ra rew-rew vêreno ra. Tevera vaazê Xocey ke hesneno, yeno zere gosdano. Xoce vano:

“Ey Musılman, to ke vazifê xuyê dini ana hurêndi, a dina de 40 Huri-Meleki dormê tode benê turav.”

Xıdır damis nêbeno, çınga hetê veri dano, vano:

“Xoce, tı waa xo na dina de bıdê mı; ez ki, huzurê na cemati de, heqa xuya 40 Huri-Meleku a dina de dan to.”

Hawar Tornêcengi