Jar-û Diyar

X. Çelker/

ZAZAKİ DE SİFETNAMÊ MORDEMÊNİ

Şanıka Sifetnama

Bi, nêbi jü cênıke be jü merıki ra bi. Rocê cênıke pê mende,

biye dıgan; new aşmi domananeweşbiyene ra tepia kewte ra, cırê dı ewladi bi. Ni cewiy (dilet) name biyêne, çı ke pia ama bi rüyê dina.Cênıke çewres roce dıxaskan mende. Çewres roce ni domani nêveti tever. Cênıka dıxaskane ki azeba çêde teyna nêverdê, goçini kerdê balişna ra ke, wa helıka gıjkıne mêêro megıno be cênıke sero, cênıke mexeneqno.

Hata ke çewres vet, ni domani sawiyê çewresi, çewres roce ra tepia derguşo sawi, dıma hal ra gore phıt, qıckek, qıc, doman, pil name bi. Ninara owo neri bi laik, bi xort; awa maykeke ki biye çêneke, biye azebe. Vanê, xortiye be azebiye şiyê re qumaşo qutmi.

No xort, yanê ez, rocê raştê jü çênekê de rındeke biya. Mın u na çêneke zerri verdê (kerde) jümini, bime maşıqê jümini. Ez daerê biya maşıq, a mırê biye maşıqe. Eşq u meşq ra tepia ma u piyê mı şi ma u piê daera a waştê, ebe na qeyde ma jümini rê bime waşti.

Waxtê ra tepia ma waşt ke jümini de bızewecime. Mı iqrar da, xorê mısaib u mısaibe kıfş kerde. Dıma deniskar na ro, destê ma hene kerdi. Rocê ki xwendi u berbi şi vêyve arde, vêyvê ma kerd; emrê Heqi dekerna, marê ma bırna, ma jümini rê bime mareber.

Ebe na qeyde ez biya wairê cêniye; cêniya mı ki biye wairê mêrdi. Şari ma merd u cêniye, mı a  xanıme, xatune, cüanıke, hermete, ya ki waira çêy, ae ki ez mêrde, cüamerd, merık,  piê domana, ya ki wairê çêy name kerdêne.

Çê piê mın u çê piê cêniya mı jümini rê bi xınami; ez çê piê dae rê biya zama, a ki çê piê mırê biye vêyve. Maa mı daerê, maa daê ki mırê biye vısturiye; piê mı daerê, piê dae ki mırê bi vıstewre. Bıraê dae mırê, bıraê mı ki daerê bi vıstewro qıc. Waa daê mırê biye baldıze, mêrdê waa dae ki bacanağ. Waa mı ki aerê biye zêyiye.

Domanê ma, yanê lac u çêna ma ke bıbiyêne, lacê ma waa xorê biyêne bıra, a ki dêrê biyêne wae.  Çêna mı ke lacê mıra pil biyêne cırê biyêne khıle (waa pile), cıra ke qıc biyêne cırê biyêne wakıle; lacê mı ke çêna mıra pil biyêne cırê biyêne khek (bırao pil), cıra ke qıc biyêne cırê biyêne bakıl.

İne cêniya mı xorê  mae name kerdê, eke venga cı da ki, cıra daê vatêne; ez xorê pi name kerdê, eke venga mı da ki, bao vatêne.

Pilê domananê ma ke lac biyêne, marê biyêne nuxri, eke çêneke biyêne, marê biyêne nuxriye.

Domananê ma, ma u piê mın u ma u piê maa xo kalık u pirıke, khalık u pirıke ki ê torn name kerdêne.

Se ke wa u bıraê piê mı mırê amıke u ded (ap) say benê, bıraê mı biyêne apê domananê lacê mı; waê mı ki biyêne amıkê dine. Ap u amıkanê dine ki inara bıraza vatêne. Se ke wa u bıraê maa mı mırê xal u xalıke say benê, waê cêniya  mı biyêne xalıkê domananê mı, bıraê cêniya mı ki biyêne xalê dine. Xal u xalıkanê dine ki inara vatêne wereza. Cêniyê xala xaloje, ya ki xalcêniye, cêniyê apa ki amoje, ya ki najniye name biyêne. Domanê ap, amıke, xal, xalıke ki inerê biyêne wêrt, domanê domananê dina ki jümini rê biyêne dereza (dedza), ya ki dereçêna (dedçêna).

Piê mı hona ke maa mı weş biye rêyna bızeweciyêne, maa mı be na cênıke ra jümini rê biyêne hewiye. Heq emro derg bıdo! Maa mı ke bımerdêne, nae ser piê mı ke jüyê de bine de bızeweciyêne Na cênıke marê biyêne demari (analığe). Piê mı ke bımerdêne, na ser maa mı ke mêrde kerdêne, o mormek marê biyêne babalığ. Ez dêmari be babalığê xorê biyêne orolığ, waa mı ki cırê biyêne orolığe.

Piê mı ke cênikê de viyae de bızeweciyêne, lacê na cênıkewê ke mêrdo verên ra biyê, marê biyêne bıramak, çênê dae ki marê biyêne waemak.

Haşa huzuri ra piê mı ke jüye de hewl biyêne (na qesa meresnê goşanê maa mı), o daerê biyêne bırak, a ki êyrê biyêne bırake. Na hewlbiyene ra ke domani pêda biyêne, şari eke çêneka ebe pince, eke laiko ebe pinc veng ra cı kerdêne.

Rocê ke piyê mı bıgınêne pıro bımerdêne, maa mı viya mendêne, biyêne cênıka viyae; xora ke maa mı bımerdêne, a taw piê mı viya mendêne, biyêne mormeko viya. Ma domani ki sêy mendêne.

Mı ke lacê xo sunet kerdêne, gereke bıeştêne pêşê jü, no lacê mırê biyêne kewra, cêniya dêy ki lacê mırê biyêne kewrae. Ma ki jümini rê biyêne iqrar. Hem kewraê mı, hem ki mısaibê mı mırê İqrarê. İqraranê mıra mısaib u mısaiba mı domananê mırê biyêne babalığ u analığe.

Ez ke bıbiyêne khal, bıbiyêne kokım, bıbiyêne rüsıpê, ya ki kamıl axıri rocê ki ez gınêne pıro merdêne. Şari ez teneşuri sera merde say kerde.

Çewresê mı ke bıveciyêne, ez ya rêştêne rama Heqi, ya ki mı pırên vurnêne rêyna amêne rüyê na dina gılore.

Rêyna vaciyêne, “bi, nêbi jü cênıke be jü merıki ra bi.”...

Şanıka sifetnamanê mordemêni ita de qediye, şiye xorê

hondê nustene ra tepia persê de mı esta torê:

To ke zana, “tornê lacê amıka pirıka khalikê piê piê mı” çıkê mıno?

Na mane de fıkr u zıkrê xo Bu ePosta adresi istek dışı postalardan korunmaktadır, görüntülüyebilmek için JavaScript etkinleştirilmelidir rê bıruşne,

bımanê weşiye de.

06.01.2011 (Qursê Zazaki ra)

X. Çelker