Jar-û Diyar

X.Çelker/„Çüye ke rınd biyêne...”

"Zonê made vanê, „çüye ke rınd biyêne cenet ra nêveciyêne"

-----------------------------------------------------

„Çüye ke rınd biyêne cenet ra nêveciyêne!..”

Zonê made vanê, „çüye ke rınd biyêne cenet ra nêveciyêne“ . Çıke çüye nişanê(1) zulm u zoriya.

Kar u gurê xo ki xoserfıkıriyaene, xoserbiyene werte ra wedardaene be kesê ke itat nêkenê, ine rae ardena.

Waxtê itıqatanê tabiya de ze wairê şew u roce, wairê hir u bereketi, wairê mali, wairê çêy wairi bi. Çıxa ke wairê dina u alemi bi ki, kar u gurê çerxê dina gılore ni waira deste bi. Ni verba jümini nêbi, jümini de haşt u phoştdar bi, yanê waira ki jüminirê wairêni kerdêne. Coka wairê waira ki bi.

Hama, seke Köroğlu vato, “çı waxt ke hasıno lonekerde veciya,  comerdiye qediya”. Hên ebe a qêyde çı waxt ke Rab veciyo werte dewrê waira ki dariyo we, qediyo. Rabê alemi wairê bini pêro xorê dışmen diyê, pêyder pêy werte ra dardê we. Kılmek ra hurinda zaf waira(2) rabi(3) gureta.

Vacino ke monoteizm, çıxa ke tam areze nêbo ki, nae ra 4000 seri ravêr ebe fıkr u zıkrê hz. İbrahimi veciyo werte. Çıke hz. İbrahim cedê hiremina itıqatanê moneteistano. Hiremina kıtabi ki, Tewratê Yahudiya, İncilê Xıristiyana be Quranê Musılmana hz. İbrahim xorê bınge cênê. Coka ni itıqati itıqatê ibrahimi(4) ki name benê.  Tarıxê Teberi de vacino ke, Hz. İbrahim zerê putxanê Babili de çıxa nişangê waira ke estê pêro sıngır kerdê, dêm dê hard, vato, “mordem gereke ni wairê ke cıra kar u zerare nêna, inamê xo be ine mêaro. Rabi verde vılê xo çewt kero...”.

Hêya, awa nawa qul Rabi verde vıleçewt mendo. Ra u rêça dêra şono.

Tıvacê Rabo ni qulanê xo nia keno har verdano jümini?

Yahudi hz. İbrahimi ra nat namê Rabi ra sebeta İsraili, hardo ke êy inarê salıx do, isana qır kenê.  Xıristiyani seyr u seferê xaçi ra nat namê Rabi ra isana qır kenê. Musılmani ki cihad ra nat “Allah Allah” vanê isana qır kenê. Ewro ki wairê ni hiremina itıqata ha ebe top u tıfang be bombanê dewleta ra, ha ebe top u tıfang be bombanê neçara(!) ra terör ramenê.

Xora kamci kıtabê itıqati de ke nia de pırê emsalanê qırkerdena isanano.

Ser u sebebê xo ki moneteizmo. Çıke moneteizm zereweşiye werte ra darda we, qulê xo kerdê dışmenê itıqatanê bina.

Seke cor vaciyo, çüye ke rınd biyêne cenet ra nêveciyêne“.

Rab ke zereweşbiyêne wairê bini xorê dışmen nêdiyêne, ebe haştiye biyena ina qebul kerdêne. Raa u rêça xo biyêne bıngê haştiye u têduştiye, serbestiye be zereweşiye.

Anciya ki quli ra omıd nêbırino...

13.10.2011

X. Çelker